Հայաստանի այս չքնաղ անկյունը սիրել են հայ մեծ դասականներից շատերը` Վ.Սարոյանը, Ս. Խանզադյանը, Պ. Սևակը, Ս. Կապուտիկյանը, Մ. Շահինյանը և ուրիշներ: Հանգստյան օրերը անցկացնելով ՙԱրարատ՚ առողջարանում` մարշալ Ի. Ք. Բաղրամյանը գրել է. ՙՋերմուկը հիանալի վայր է. ոչ մի տեղ նման հիասքանչ վայր չես գտնի: Այս ամբողջ •եղեցկությունը բառերով նկարա•րելու համար պետք է Րաֆֆի լինել… Կլիման այստեղ հոյակապ է. զանգեզուրյան լեռները վեհ են և ազդեցիկ …՚: Իսկ Վ. Սարոյանը գրել է. ՙԻմ սիրած անկյունը Հայաստանում Ջերմուկն է: Այն գտնվում է մի հարթակի վրա, որը շրջապատված է հարուստ անտառածածկ ունեցող սարերով: Ջերմուկի վայրի գեղեցկությունն ու թարմությունը նրա կանաչ ստվերի հետ միասին Արարատյան դաշտի այրող արևից հետո՝ ապահովում են մարդու լիակատար հանգիստը՚: Առողջարանային քաղաք Ջերմուկը գտնվում է ՀՀ հարավ-արևելյան մասում, մայրաքաղաք Երևանից 173 կմ հեռավորության վրա, ծովի մակարդակից մինչև 2080 մ բարձրության վրա: Ջերմուկն անկրկնելի է բյուրեղյա մաքուր օդով, բազմատեսակ խոտերի ու ծաղիկների բուրմունքով: Կլիման տիպիկ լեռնային է, ալպիական: Ամառը զով է, իսկ ձմեռը` երկարատև ու ձյունաշատ, բայց տաք, արևոտ ու հաճելի: Տարվա ընթացքում 250-300 օր արևոտ է: Մթնոլորտային ճնշումը մոտ 600 մմ ս.ս. է: Անամպ օրերը, եզակի բուժիչ հանքային ջուրը, գեղեցիկ ջրվեժը, մեղմ կլիման, մաքուր օդը և չափավոր խոնավությունը կազմում են առողջարանային քաղաքի բաղադրիչ մասերը: Հենց այդ պատճառով էլ Ջերմուկը համարվում է Հայաստանի ամենասիրված առողջարանային քաղաքը թե՛ բուժման,թե՛ հանգստի և թե՛ ժամանցի համար: Այստեղ է գտնվում նաև ՙԱրարատ՚ մոր և մանկան առողջարանը: Մարդիկ այստեղ կարող են և լավ բուժվել, և լավ հանգստանալ: